Maturska ekskurzija poslije 40 godina

14

I ja sam bio mlad kao i ti, možda i mlađi, natpis je na narandžastoj majici jednog od 30 maturanta koji su ovih dana svoju mladost i drugarstvo ovjerili na maturskoj eksurziji.

Njihova osnovna profesija je maturant.

Sve ostalo za njih ne važi, ni zvanje, ni nacija, ni vjera, ni ne daj Bože političko opredjeljenje.

Svi su lučonoše i svima su sve petice u svjedočanstvu iz drugarstva, radosti, ljepote, karakatera i morala, časti i poznavanja ljudskosti.

Generacija maturanata 1976/77 kotorske Gimnazije, njih 60, u julu je proslavila 40 godina mature u PC “Vukšić” uz pravu feštu i okean emocija koje ih vezuju.

Tada je jedan od njih predložio eksurziju, baš kao nekad.

Organizacija je počela odmah, pronašla se  agencija, krenula uplata povoljnih rata za Split i hotel “Bellevue” čijim hodnikom i sobama još odzvanja smijeh i pjesma ovih vječno mladih ljudi.

Toliko duha, bezazlenosti čistote duše, osobenosti koja iz okeana originalnosti uvijek novi biser izroni teško se nalazi.

Ovoj generaciji je upravo to pogon koji ih i u šezdesetim drži na okupu.

Krenuli su autobusom iz Kotora, na catari prihvatili društvo iz Prčanja, Stoliva i Tivta uz onu himničnu “da smo živi i zdravi još godina sto” nastavili put.

U autobusu gimnazijske marende, grizini i bomboni, ruštule, bićerin, ali i prva šira, liker orahnjača, gitara do Neuma i prve stanice uz vreću prvih mandarina, koje je za drugare kupila i u autobusu dijelila meštrica od gitare.

Kilometri su se prosto topili uz anegdote i preticanja u sjećanjima školskih dana, bisere od nestašluka do ukora o predisključenju  zbog partije  mausa u male pare, kod bubnjara peći u oblaku dima pušačkih veterana već sa 18 godina.

Jedan od njih, bacajući kartu reče: “dođeš mi”, a iznad njega glas i stas razrednog starješine i njegov odgovor “došao sam ti”.

U tom i takvom vulkanu radosti i raspoloženja, stiglu su u Split i odmah do prve klape na Peristilu, đe su podigli bulikan.

Pjevači iz generacije odmah su se pridružili klapi, a ovi drugi u ples sa refrenom “da te pismom mogu zvati”.

Stranci koji su se tu zadesili imali su pravi gušt, a generacija kotorskih maturanata ušla je u telefonske klipove i slike.

U istom ritmu bez pauze, splitksom rivom, trogirskim  kaletama  do drugarske večeri u “Starom mornaru” .

Za ovaj bulikan reporteru nedostaju riječi. Samo ću reći ovako: Dioklecijan je poslije ove maturske fešte pitao – koji su ovo?

Kada su mu rekli da su Split digli na noge kazao je: Kada drugi put dođu, da ih dočekaju galije carske na splitska vrata i da fanfare s kampanela Sv. Duje objave njihov dolazak, a zvona grada pozdrave generaciju kluba M 77.

Danas lete poruke na njihovom vajberu-viberu od kojih za kraj izdvajam pismo jedne maturantkinje:

….Bez obzira na naše godine  i životne uloge  koje imamo, jasno se mogla osjetiti energija mladosti, poleta, snage, radosti, zajedništva kojom smo se još davno neraskidivo povezali. Čuvajmo to naše zajedničko blago i dalje.

“Da su živi i zdravi još godina sto, da je pjesme i vina i da ih čuva Bog”!

Dubravka Jovanović

14 KOMENTARI

  1. Svaki komentar je suvisan. Divni ste a ja vam od srca cestitam sve ove godine sto ste ostavili iza vas, a vi ostali isti. Da ste mi svi jos dugo ZIVI I ZDRAVI!

  2. Predivno 💖 Da sam znala bar bi ih došla pozdravit na Peristil i zapivat sa njima😊Nadam se da ćemo i mi ovako jednog dana. Svaka čast!

  3. Bravo vam ga primjer ste i za druge.Vašim stopama i ovom idejom će vjerujem i moja generacija koja je dvije godine starija. Bravo MATURANTI šezdesetogodišnjaci a kao da vam je 18.

  4. BRAVOOOOOO PO 100 PUTA
    AKO BOG BUDE DAO I MI CEMO NAREDNE GODINE, GENERACIJA MATURANATA 77-78
    PRELIJEPE DJEVOJKE, PRELIJEPIH OSMJEHA , NJIHOVI PREDIVNI GLASOVI GIMNAZIJSKIM HODNIKOM KOJE JOS CUJEM ! U JEDNU SAM BIO LUDO, NESRETNO ZALJUBLJEN.
    NAUCIMO GENERACIJE KOJE STASAVAJU STO JE VAZNO !!!!!!!

      • Pogodio si Petre ! Njih 5 iz jezickog smjera pjevale su na svaki mali odmor izmedju casova . Bisernice im nisu ni u cavatu pa neka vjezbaju po cijeli dan.

OSTAVI KOMENTAR

Please enter your comment!
Please enter your name here